Sizi 6-cı Azərbaycan Beynəlxalq “Qarabağın Bərpa, Yenidənqurma və İnkişafı” – “Rebuild Garabagh” sərgisinin açılışı münasibətilə səmimi-qəlbdən salamlayır, tədbirin bütün iştirakçılarına uğurlar arzulayıram. 

44 günlük Vətən müharibəsində qazanılmış Zəfər Qarabağ və Şərqi Zəngəzur üçün yeni quruculuq və inkişaf mərhələsinin əsasını qoymuşdur. “Böyük Qayıdışa dair I Dövlət Proqramı” çərçivəsində şəhər və kəndlərimiz yenidən qurulur, soydaşlarımızın dogma yurdlarına təhlükəsiz qayıdışı təmin edilir. Azərbaycan bu işləri öz maliyyə imkanları hesabına həyata keçirir. İndiyədək bərpa və yenidənqurmaya dövlət büdcəsindən 25,5 milyard manat vəsait ayrılmışdır. 

Böyük Qayıdışın təhlükəsiz həyata keçirilməsi üçün 300 min hektardan çox ərazi minalardan və partlayıcı sursatdan təmizlənmiş, 47 yaşayış məntəqəsinə 40 mindən çox insan qayıtmışdır. İşğaldan azad edilmiş ərazilərdə hazırda 100 minə yaxın insan yaşayır, təhsil alır və fəaliyyət göstərir. 

Qarabağ və Şərqi Zəngəzurda qurulan nəqliyyat infrastrukturu yaşayış məntəqələrini bir-biri ilə və ölkənin vahid iqtisadi məkanı ilə birləşdirir. İndiyədək 1500 kilometrə yaxın yol tikilmiş, 11,7 kilometr uzunluğunda Murovdağ tuneli dünyada mürəkkəb dağlıq şəraitdə həyata keçirilən quruculuq işlərinin mühüm mühəndislik nümunəsinə çevrilmişdir. Füzuli, Zəngilan və Laçın beynəlxalq hava limanları istifadəyə verilmişdir. Dəmir yollarının inşası davam etdirilir. Horadiz-Ağbənd dəmir yolu xətti Zəngəzur dəhlizinin mühüm tərkib hissəsi kimi Azərbaycanın beynəlxalq nəqliyyat və logistika əlaqələrinin genişlənməsində strateji əhəmiyyət daşıyır. 

Yeni yaşayış məntəqələrinin və istehsal sahələrinin fəaliyyəti üçün enerji və su təminatı da yaradılır. Regionda 1 yeni su anbarı tikilmiş və 5 su anbarı bərpa edilmiş, 13 yarımstansiya və ümumi gücü 307 meqavat olan 38 su elektrik stansiyası istismara verilmişdir. Qarabağ və Şərqi Zəngəzurun “yaşıl enerji zonası” kimi inkişaf etdirilməsi bu infrastrukturun qurulmasında əsas istiqamətlərdən biridir. 

İnfrastrukturun inkişafı yaşayış məntəqələrində müasir sosial xidmətlərin təşkili ilə müşayiət olunur. Regionda 40 təhsil və 20 səhiyyə müəssisəsi, habelə Xankəndidə Qarabağ Universiteti fəaliyyətə başlamışdır. Dövlət, bank, poçt və rabitə xidmətlərinin də əhatəsi genişlənir. Laçın, Zəngilan, Füzuli və Ağdamda tikilərək istifadəyə verilmiş inzibati mərkəzlər sosial təminat, məşğulluq və digər sahələrdə xidmətlərin əhaliyə vahid məkanda operativ göstərilməsinə imkan verir. 

İnfrastruktur quruculuğu Qarabağın və Şərqi Zəngəzurun tarixi-mədəni simasının bərpası ilə tamamlanır. İşğal dövründə dağıdılmış və zərər görmüş tarixi-mədəni və dini abidələrin bərpası, müasir turizm infrastrukturunun yaradılması regionun zəngin irsinin qorunmasına, mədəni və mənəvi həyatının dirçəlməsinə, turizm potensialının reallaşdırılmasına xidmət edir. 

Regionun dirçəldilməsi işğalın ekoloji fəsadlarının aradan qaldırılmasını da əhatə edir. İşğal dövründə 54,3 min hektar meşə sahəsi məhv edilmiş, torpaq və su ehtiyatları çirkləndirilmişdir. İndiyədək 600 hektar meşə fondu bərpa olunmuşdur. Çünki meşələrin və su ekosistemlərinin bərpası, iqlim dəyişmələrinin təsirlərinə davamlı tikinti həllərinin tətbiqi regionun uzunmüddətli inkişafı üçün xüsusi əhəmiyyət daşıyır. 

Böyük Qayıdışa dair Dövlət Proqramının növbəti ikinci mərhələsində əsas məqsəd yaradılmış imkanlar əsasında özəl investisiyaları, daimi məşğulluğu və ixracyönümlü istehsalı daha da genişləndirmək, Qarabağ və Şərqi Zəngəzurun ölkə iqtisadiyyatında yeni artım mərkəzi kimi mövqeyini möhkəmləndirməkdir. Regionda tətbiq edilən qabaqcıl şəhərsalma və mühəndislik həlləri Azərbaycanın digər bölgələri ilə yanaşı, beynəlxalq miqyasda da istifadə oluna biləcək təcrübə yaradır. 

Bu baxımdan, 2026-cı ildə Bakıda BMT-nin Məskunlaşma Proqramının təşkilatçılığı ilə Dünya Şəhərsalma Forumunun (WUF13) uğurla keçirilməsi ölkəmizin şəhərsalma sahəsində əldə etdiyi nailiyyətlərin beynəlxalq səviyyədə təqdim olunmasına və qlobal dialoqda mövqeyinin möhkəmlənməsinə xidmət etmişdir. 

“Xəzər İnşaat Həftəsi” çərçivəsində keçirilən “Rebuild Garabagh” və “BakuBuild” sərgiləri həmin təcrübənin paylaşılmasına, yeni texnologiyaların təqdimatına və işgüzar tərəfdaşlıqlar qurulmasına geniş imkanlar yaradır. Əminəm ki, bu tərəfdaşlıqlar konkret layihələrdə də öz əksini tapacaq, Böyük Qayıdışa və regionun uzunmüddətli inkişafına mühüm töhfə verəcəkdir. 

Sərginin işinə uğurlar, hər birinizə fəaliyyətinizdə yeni nailiyyətlər arzulayıram. 

Bakı şəhəri, “14” oktyabr 2026-cı il 

Sizi Azərbaycan Respublikası Sahibkarlar (İşəgötürənlər) Təşkilatları Milli Konfederasiyası adından 31-ci Yubiley Azərbaycan Beynəlxalq İnşaat Sərgisi – “BakuBuild” və 6-cı Beynəlxalq Qarabağın Bərpası, Yenidənqurulması və İnkişafı Sərgisi – “Rebuild Garabagh” münasibətilə ürəkdən salamlayıram. 

Azərbaycan Respublikası Prezidentinin rəhbərliyi ilə həyata keçirilən ardıcıl iqtisadi islahatlar, əlverişli biznes mühitinin formalaşdırılması və sahibkarlığa dövlət dəstəyinin gücləndirilməsi ölkəmizin iqtisadi inkişafına mühüm töhfə verir. Bu siyasətin əsas istiqamətlərindən biri iqtisadiyyatın şaxələndirilməsi, qeyri-neft-qaz sektorunun inkişafı və özəl sektorun iqtisadi fəallığının artırılmasıdır. 

2025-ci ilin yekunları da bu istiqamətdə əldə olunan nəticələri əks etdirir. İl ərzində Azərbaycanda 129,1 milyard manatlıq ümumi daxili məhsul istehsal olunub və iqtisadi artım 1,4 faiz təşkil edib. Qeyri-neft-qaz sektorunda 2,7 faiz, qeyri-neft-qaz sənayesində isə 5,5 faiz artım qeydə alınıb. Tikinti sahəsinin ölkənin ümumi daxili məhsulunda payı 6,5 faiz olub. Bu göstəricilər iqtisadiyyatın şaxələndirilməsində, istehsal və infrastruktur imkanlarının genişləndirilməsində tikinti sektorunun və sahibkarlığın əhəmiyyətini bir daha təsdiqləyir. 

İşğaldan azad edilmiş ərazilərin bərpası və Böyük Qayıdışın təmin edilməsi ölkəmizin qarşısında duran strateji prioritetlərdəndir. Qarabağ və Şərqi Zəngəzurda həyata keçirilən genişmiqyaslı quruculuq işləri yeni iqtisadi imkanlar yaradır, müasir infrastrukturun formalaşmasına, yaşayış məntəqələrinin yenidən qurulmasına və əhalinin doğma torpaqlarına qayıdışına xidmət edir. 

Bu prosesdə tikinti şirkətləri, layihələndirmə və mühəndislik müəssisələri, tikinti materialları istehsalçıları, logistika şirkətləri və digər sahibkarlıq subyektləri mühüm rol oynayırlar. Qarşıda duran vəzifə yalnız müasir binalar və yollar inşa etmək deyil, eyni zamanda həmin ərazilərdə dayanıqlı iqtisadi fəaliyyət, yeni iş yerləri və uzunmüddətli məşğulluq imkanları yaratmaqdır. Bunun üçün dövlət və özəl sektor arasında əməkdaşlığın genişləndirilməsi, yerli istehsalın təşviqi və sahibkarların investisiya təşəbbüslərinin dəstəklənməsi xüsusi əhəmiyyət daşıyır. 

Qarabağın və Şərqi Zəngəzurun yaşıl enerji potensialı da regionun gələcək inkişafı üçün mühüm imkanlar açır. Bərpa olunan enerji mənbələrinin tətbiqi, enerji səmərəliliyi, ekoloji cəhətdən dayanıqlı tikinti həlləri və müasir texnologiyaların istifadəsi bu ərazilərdə yeni iqtisadi modelin formalaşmasına xidmət edə bilər. Bu istiqamətdə innovativ yanaşmaların tətbiqi Azərbaycanın yaşıl iqtisadiyyata keçid hədəflərinə də töhfə verəcək. 

Hörmətli qonaqlar! 

“BakuBuild” və “Rebuild Garabagh” sərgiləri tikinti və inşaat sənayesinin aparıcı şirkətlərini, investorları, istehsalçıları və mütəxəssisləri bir araya gətirən mühüm beynəlxalq platformalardır. Bu sərgilər yeni texnologiyaların, müasir tikinti materiallarının və innovativ həllərin təqdim edilməsi ilə yanaşı, yerli və xarici şirkətlər arasında biznes əlaqələrinin qurulmasına, investisiya imkanlarının müzakirəsinə və qarşılıqlı faydalı əməkdaşlığın genişlənməsinə şərait yaradır. 

Xüsusilə Qarabağın bərpasına həsr olunmuş “Rebuild Garabagh” sərgisi özəl sektorun diqqətini regionun iqtisadi potensialına yönəltmək, sahibkarların yeni layihələrə cəlb olunmasını təşviq etmək və bərpa prosesində beynəlxalq təcrübədən faydalanmaq baxımından mühüm əhəmiyyət kəsb edir. 

Azərbaycan Sahibkarlar Konfederasiyası olaraq, sahibkarların maraqlarının müdafiəsini, dövlət-biznes dialoqunun gücləndirilməsini və yerli müəssisələrin iqtisadi inkişaf proseslərində daha fəal iştirakını əsas prioritetlərimizdən hesab edirik. Qarabağın bərpası, tikinti sektorunun inkişafı və ölkəmizin rəqabətqabiliyyətli iqtisadiyyatının formalaşdırılması istiqamətində biznes ictimaiyyətinin səylərini dəstəkləməyə hazırıq. 

İnanıram ki, bu sərgilər yeni tərəfdaşlıqların qurulmasına, uğurlu investisiya təşəbbüslərinin yaranmasına və ölkəmizin iqtisadi inkişafına töhfə verəcək. 

Sərgilərin təşkilatçılarını, iştirakçılarını və bütün qonaqları bu əlamətdar hadisə münasibətilə təbrik edir, hər birinizə uğurlu görüşlər, səmərəli əməkdaşlıq, yeni müqavilələr və böyük nailiyyətlər arzulayıram. 

Diqqətinizə görə təşəkkür edirəm! 

Azərbaycan Sərgi Təşkilatçıları Assosiasiyası (ASTA) adından sizi Caspian Construction Week 2026 çərçivəsində keçirilən 6-cı Azərbaycan Beynəlxalq Qarabağın Bərpa, Yenidənqurma və İnkişafı Sərgisi (Rebuild Garabagh), 31-ci Azərbaycan Beynəlxalq İnşaat Sərgisi (BakuBuild), 18-ci Beynəlxalq İstilik, Havalandırma, Kondisionerləşdirilmə, Su təchizatı, Santexnika və Üzgüçülük Hovuzu Sərgisi (Aquatherm Baku), 5-ci Xəzər Beynəlxalq Plastik və Polimer Sənayesi Sərgisi (Plastex Caspian) və 14-cü Xəzər Beynəlxalq Yol İnfrastrukturu və İctimai Nəqliyyat Sərgisi (Road&Traffic) sərgilərində salamlayıram. 

Bu gün sərgi sənayesi iqtisadi inkişafın, investisiyaların cəlb edilməsinin və beynəlxalq əməkdaşlığın möhkəmləndirilməsinin mühüm vasitələrindən biridir. Məhz beynəlxalq sərgilər peşəkar dialoq, innovativ həllərin nümayişi, təcrübə mübadiləsi və yeni işgüzar tərəfdaşlıqların formalaşdırılması üçün şərait yaradır. 

Azərbaycan beynəlxalq sərgilərin, forumların və konqreslərin keçirildiyi tanınmış mərkəz kimi mövqeyini ardıcıl olaraq möhkəmləndirir. Ölkəmizdə getdikcə daha çox nüfuzlu beynəlxalq tədbirlər keçirilir ki, bu da beynəlxalq ictimaiyyətin yüksək etimadını və Azərbaycanın qlobal peşəkar ünsiyyət üçün müasir platforma kimi artan nüfuzunu təsdiqləyir. Bunun parlaq təsdiqi 2026-cı ildə Bakıda dövlətlərin, beynəlxalq təşkilatların, biznes dairələrinin və ekspert icmasının nümayəndələrini şəhərlərin dayanıqlı inkişafı məsələlərini müzakirə etmək üçün bir araya gətirən Ümumdünya Şəhərsalma Forumunun (World Urban Forum – WUF) keçirilməsi oldu. 

Bu prosesdə Caspian Construction Week xüsusi yer tutur. Regionun ən böyük sahəvi tədbirlərindən biri olan bu tədbir artıq otuz ildən çoxdur ki, tikinti, memarlıq, infrastruktur və mühəndislik sahələrinin aparıcı nümayəndələrini bir araya gətirir. Sərgilər kompleksi işgüzar əlaqələrin inkişafına, müasir texnologiyaların tətbiqinə, qabaqcıl təcrübə mübadiləsinə və birgə layihələrin həyata keçirilməsinə töhfə verir. 

Caspian Construction Week çərçivəsində Rebuild Garabagh sərgisi xüsusi əhəmiyyət kəsb edir. Bu sərgi Azərbaycanın azad edilmiş ərazilərində həyata keçirilən genişmiqyaslı dəyişiklikləri əks etdirir. Bu gün sərgi yalnız Qarabağın bərpası və inkişafı sahəsində əldə olunan nailiyyətlərin nümayiş olunduğu platforma deyil, həm də strateji əhəmiyyətli layihələrin həyata keçirilməsi üçün beynəlxalq biznesin, investisiyaların və innovativ həllərin cəlb edilməsinin səmərəli vasitəsidir. 

Azərbaycan Sərgi Təşkilatçıları Assosiasiyası bundan sonra da ölkənin sərgi sənayesinin inkişafına, beynəlxalq əməkdaşlığın möhkəmləndirilməsinə və Azərbaycanın dünya səviyyəli tədbirlərin keçirildiyi nüfuzlu platforma kimi tanıdılmasına dəstək göstərəcəkdir. 

Bütün iştirakçılara və qonaqlara səmərəli iş, uğurlu danışıqlar, yeni peşəkar əlaqələr, qarşılıqlı faydalı əməkdaşlıq və perspektivli layihələrin həyata keçirilməsini arzulayıram.